La bohème version kabyle

Ak-d-aḥkuɣ af yiwen zman

Wid n tura ur d-cfan

Laɛbad zik amek i ṭ-ɛicin

Imdanen ḥfan ɛran

Tifexsiwin deg ggarzan

Ččan akkarfa d w-uclim

Ccetwa amek i ṭ-arnan

S uqeddaṛ akk d w-azdam

N igectumen ṭ-qecṛin

Ṣebṛen i taṛẓeg bb-ussan

Refden taɛkkemt lemḥan

Luwqat katen ṭɛeddin

Lecɣɣal d-akken d msennan

Yal wa amek is destufan

Am yargazen am tulawin

Tislit t-gguni axxam

Tamɣaṛt d-irebbi lufan

Irgazen fɣen ad-lwin

D-ggiḍ ar lkanun zdan

S tmucuha d yemɛan

Tettun aɣbel d ttexmim

          -----------------

Di lexṛif karzen zaṛɛen

Deg nebdu ssarwaten

Yečča ymay yefṛaḥ bab-is

Lɣella ma a ṭ-id-megren

Ṭmektayen-d wi lluẓen

S axxam a t-yaweḍ nṣib-is

Ameɣbun maca at-ḥegfen

Ṛebbi yḥarziten

Yal wa yburek-as di cci-s

Ḍefren abrid akk yiwen

Kif taḍsa kif laḥzen

Qaṛen-as mraḥba s tikci-s

Ur reffun ur tqelliqen

Akken is-end tusa akken

Ṛebbi yxeddem ccɣel-is

Am akken lweqat ḥebsen

Siwa ussan i g ṭazzalen

Tumeɣɣaṛ ad tebggen iman-is

D iseggasen ṭsarsiren

Ɣas win yṛuḥen

Waniḍen ad yettef amkan-is___Y/S